భారత్‌లో తొలి స్వదేశీ యాంటీబయాటిక్ ‘నాఫిథ్రోమైసిన్’ ఆవిష్కరణ
మొండి శ్వాసకోశ ఇన్ఫెక్షన్లపై సమర్థవంతంగా పనిచేసే ఔషధం
క్యాన్సర్, డయాబెటిస్ రోగులకు ఎంతో ప్రయోజనకరం
హీమోఫిలియాకు జన్యు చికిత్స.. దేశీయంగా తొలి క్లినికల్ ట్రయల్ విజయం
పరిశోధనల కోసం రూ. 50,000 కోట్లతో ఏఎన్ఆర్ఎఫ్ ఏర్పాటు
వైద్య రంగంలో ఆర్టిఫిషియల్ ఇంటెలిజెన్స్ వినియోగంపై మంత్రి వ్యాఖ్యలు
వైద్య పరిశోధన రంగంలో భారత్ ఒక కీలక మైలురాయిని అందుకుంది.
దేశంలోనే తొలిసారిగా పూర్తి స్వదేశీ పరిజ్ఞానంతో ‘నాఫిథ్రోమైసిన్’ అనే కొత్త యాంటీబయాటిక్‌ను అభివృద్ధి చేసినట్టు కేంద్ర సైన్స్ అండ్ టెక్నాలజీ శాఖ సహాయ మంత్రి (స్వతంత్ర హోదా) డాక్టర్ జితేంద్ర సింగ్ శనివారం ప్రకటించారు. మొండిగా మారిన శ్వాసకోశ ఇన్ఫెక్షన్లను ఎదుర్కోవడంలో ఈ యాంటీబయాటిక్ అత్యంత సమర్థవంతంగా పనిచేస్తుందని ఆయన తెలిపారు.
ఢిల్లీలో జరిగిన ఒక వైద్య సదస్సులో ఆయన మాట్లాడుతూ, ముఖ్యంగా క్యాన్సర్ రోగులు, మధుమేహం అదుపులో లేని వారికి ఈ కొత్త ఔషధం ఎంతో మేలు చేస్తుందని వివరించారు. ఈ ఔషధానికి సంబంధించిన ఆలోచన, అభివృద్ధి, క్లినికల్ ప్రయోగాలు అన్నీ పూర్తిగా భారత్‌లోనే జరగడం ఫార్మా రంగంలో ఆత్మనిర్భరతకు నిదర్శనమని జితేంద్ర సింగ్ పేర్కొన్నారు.
ఇదే సందర్భంలో, హీమోఫిలియా వ్యాధికి జన్యు చికిత్సలో కూడా భారత్ చరిత్రాత్మక విజయం సాధించిందని మంత్రి వెల్లడించారు. దేశీయంగా నిర్వహించిన తొలి క్లినికల్ ట్రయల్ విజయవంతమైందని, ఈ చికిత్స ద్వారా 60 నుంచి 70 శాతం వరకు వ్యాధిని సరిదిద్దగలిగామని ఆయన చెప్పారు. ఈ ప్రయోగాల ఫలితాలను ‘న్యూ ఇంగ్లాండ్ జర్నల్ ఆఫ్ మెడిసిన్’లో ప్రచురించారని, ఇది భారత వైద్య పరిశోధనల సత్తాను ప్రపంచానికి చాటిందని అన్నారు. ప్రభుత్వ బయోటెక్నాలజీ విభాగం సహకారంతో వెల్లూరులోని క్రిస్టియన్ మెడికల్ కాలేజీలో ఈ ప్రయోగాలు జరిగాయని తెలిపారు.
దేశంలో పరిశోధనలను ప్రోత్సహించేందుకు ఐదేళ్ల కాలానికి రూ. 50,000 కోట్ల బడ్జెట్‌తో ‘అనుసంధాన్ నేషనల్ రీసెర్చ్ ఫౌండేషన్’ (ఏఎన్ఆర్ఎఫ్) ఏర్పాటు చేస్తున్నట్లు మంత్రి తెలిపారు. ఇప్పటికే భారత్ 10,000కు పైగా మానవ జన్యువులను సీక్వెన్స్ చేసిందని, ఈ సంఖ్యను పది లక్షలకు పెంచడమే లక్ష్యమని ఆయన స్పష్టం చేశారు. ఆర్టిఫిషియల్ ఇంటెలిజెన్స్ (ఏఐ), బయోటెక్నాలజీ వంటి ఆధునిక సాంకేతికతలను అనుసంధానిస్తూ వైద్య రంగంలో విప్లవాత్మక మార్పులు తీసుకురావాల్సిన అవసరం ఉందని జితేంద్ర సింగ్ అభిప్రాయపడ్డారు.
