604 బస్సులపై కేసులు.. 102 బస్సులు సీజ్! దడదడలాడిస్తున్న RTOలు
గోల్డెన్ న్యూస్/ఆంధ్రప్రదేశ్: కర్నూలు ఘటన తర్వాత కర్ణాటక ప్రభుత్వం ప్రైవేట్ బస్సు భద్రతపై కఠిన చర్యలు తీసుకుంది. 12 బృందాలతో విస్తృత తనిఖీలు నిర్వహించి, అత్యవసర నిష్క్రమణ, అగ్నిమాపక యంత్రం వంటి భద్రతా లక్షణాలను పరిశీలించారు. 4,452 బస్సులను తనిఖీ చేసి, 604పై కేసులు నమోదు చేయగా, 102 బస్సులు సీజ్ అయ్యాయి._
అక్టోబర్ 24న హైదరాబాద్ నుండి బెంగళూరు వస్తున్న ఒక ప్రైవేట్ కంపెనీకి చెందిన ఏసీ స్లీపర్ బస్సులో మంటలు చెలరేగి 19 మంది ప్రయాణికులు సజీవ దహనమైన విషయం తెలిసిందే. దీంతో కర్ణాటక ప్రభుత్వం కఠిన చర్యలకు సిద్ధమైంది. భద్రతా చర్యలు పాటించని అన్ని ప్రైవేట్ బస్సులను తనిఖీ చేసి నివేదిక సమర్పించాలని ఆ రాష్ట్ర రవాణా శాఖ కమిషనర్‌కు కఠినమైన ఆదేశాలు జారీ చేశారు. అదనపు రవాణా కమిషనర్ నేతృత్వంలో బెంగళూరు నగరం, గ్రామీణ ప్రాంతాల్లో సైతం బస్సులను తనిఖీ చేయడానికి మొత్తం 12 బృందాలను ఏర్పాటు చేశారు.
ఎమర్జెన్సీ ఎగ్జిట్‌ సిస్టమ్‌, అగ్నిమాపక యంత్రం, ప్రథమ చికిత్స వస్తు సామగ్రి, ప్రయాణీకుల వాహనాల్లో అక్రమంగా రవాణా చేస్తున్న వస్తువులు వంటి ప్రయాణీకుల భద్రతా లక్షణాలను లక్ష్యంగా చేసుకుని ఈ తనిఖీ జరిగింది. రవాణా శాఖ అధికారులు అక్టోబర్ 24 నుండి నవంబర్ 5 వరకు 13 రోజులుగా భారీ ఆపరేషన్ నిర్వహిస్తున్నారు. బెంగళూరు, నగర పరిసర ప్రాంతాలతో సహా 13 RTOల నుండి ఈ ఆపరేషన్ జరుగుతోంది.
4,452 ప్రైవేట్ బస్సులను తనిఖీ చేసి 604 బస్సులపై కేసులు నమోదు చేశారు. 102 బస్సులను సీజ్ చేశారు. ఈ బస్సుల నుండి పన్ను, జరిమానా రూపంలో రూ.1,09,91,284 జరిమానా వసూలు చేశారు. మొత్తం మీద కర్నూలు ఘటనతో అప్రమత్తమైన రవాణా శాఖ అధికారులు భారీ ఆపరేషన్ నిర్వహించి, భద్రతా చర్యలు పాటించని బస్సు యజమానులను తగిన విధంగా శిక్షించారు. ప్రైవేట్ బస్సు యజమానులు కూడా మేల్కొంటారో లేదో చూడాలి.
