మరో ఇద్దరు గాంధీ ఆసుపత్రికి తరలింపు.. ఒకే ఫ్లైట్లో వచ్చిన ముగ్గురు అనుమానితులు
గోల్డెన్ న్యూస్ /హైదరాబాద్ / హైదరాబాద్లో ఎబోలా వైరస్ అనుమానిత కేసులు వెలుగులోకి రావడంతో వైద్య ఆరోగ్య శాఖ అప్రమత్తమైంది. ఎబోలా లక్షణాలతో మరో ఇద్దరు వ్యక్తులను సికింద్రాబాద్లోని గాంధీ ఆసుపత్రికి తరలించగా, ప్రస్తుతం అక్కడ ఐసోలేషన్ వార్డులో చికిత్స పొందుతున్న అనుమానితుల సంఖ్య ముగ్గురికి చేరింది.
సమాచారం ప్రకారం, ఈరోజు తెల్లవారుజామున ఇద్దరు వ్యక్తులు జూబ్లీహిల్స్లోని అపోలో ఆసుపత్రికి వెళ్లగా, వారి ఆరోగ్య పరిస్థితిని పరిశీలించిన వైద్యులు ఎబోలా లక్షణాలు ఉన్నట్లు అనుమానించారు. అనంతరం వారిని ప్రత్యేక నిఘా, చికిత్స కోసం గాంధీ ఆసుపత్రికి తరలించారు. నిన్న కూడా ఇదే తరహా లక్షణాలతో మరో వ్యక్తిని గాంధీ ఆసుపత్రిలో చేర్చారు.
వైద్య ఆరోగ్య శాఖ అధికారులు చేపట్టిన ప్రాథమిక విచారణలో ముగ్గురు అనుమానితులు కూడా విదేశాల నుంచి ఒకే విమానంలో హైదరాబాద్కు వచ్చినట్లు గుర్తించారు. దీంతో ఆ విమానంలో ప్రయాణించిన ఇతర ప్రయాణికుల వివరాలను అధికారులు సేకరిస్తున్నారు. అవసరమైతే వారిని కూడా వైద్య పరీక్షలకు పిలిచే అవకాశం ఉందని సమాచారం.
ప్రస్తుతం ముగ్గురు బాధితులను ప్రత్యేక ఐసోలేషన్ వార్డులో ఉంచి వైద్యులు నిరంతరం పర్యవేక్షిస్తున్నారు. వారి రక్త నమూనాలను సేకరించి పుణెలోని National Institute of Virology (NIV) కు పంపేందుకు అధికారులు ఏర్పాట్లు చేస్తున్నారు. పరీక్షల ఫలితాలు వచ్చిన తర్వాతే ఎబోలా వైరస్ సోకిందా లేదా అనే విషయంపై స్పష్టత రానుంది.
ఎబోలా వైరస్ అనేది అత్యంత ప్రమాదకరమైన వైరల్ వ్యాధిగా గుర్తించబడింది. అధిక జ్వరం, తీవ్రమైన తలనొప్పి, కండరాల నొప్పులు, వాంతులు, విరేచనాలు వంటి లక్షణాలు కనిపించవచ్చు. తీవ్ర స్థితిలో రక్తస్రావం వంటి సమస్యలు తలెత్తే అవకాశం ఉంటుంది.
అయితే ప్రజలు ఆందోళన చెందాల్సిన అవసరం లేదని, అన్ని రకాల ముందస్తు జాగ్రత్తలు తీసుకుంటున్నామని వైద్య ఆరోగ్య శాఖ అధికారులు తెలిపారు. అనుమానితుల పరీక్షా ఫలితాలు వచ్చే వరకు పరిస్థితిని నిశితంగా పర్యవేక్షిస్తున్నట్లు వెల్లడించారు.
