గోల్డెన్ న్యూస్ / హైదరాబాద్ / వేసవి సెలవుల అనంతరం తెలంగాణ రాష్ట్రంలోని అన్ని ప్రభుత్వ, ప్రైవేట్, ఎయిడెడ్ పాఠశాలలు జూన్ 15 నుంచి పునఃప్రారంభం కానున్నాయి. ఈ మేరకు రాష్ట్ర విద్యాశాఖ అధికారిక ఉత్తర్వులు జారీ చేసింది. వాస్తవానికి జూన్ 12న పాఠశాలలు ప్రారంభం కావాల్సి ఉన్నప్పటికీ, పరిపాలనా మరియు విద్యా పరమైన కారణాలను పరిగణనలోకి తీసుకుని ప్రారంభ తేదీని జూన్ 15కు మార్చినట్లు అధికారులు వెల్లడించారు.
జూన్ 12న పాఠశాలలు తెరిచిన వెంటనే జూన్ 13న రెండో శనివారం, జూన్ 14న ఆదివారం సెలవులు రావడంతో విద్యా కార్యక్రమాల నిర్వహణలో అంతరాయం కలిగే అవకాశం ఉందని ప్రభుత్వం భావించింది. ఒకరోజు మాత్రమే తరగతులు నిర్వహించి వరుస సెలవులు ఇవ్వడం విద్యార్థులు, ఉపాధ్యాయులకు అసౌకర్యంగా మారుతుందనే అభిప్రాయంతో ఈ నిర్ణయం తీసుకుంది. దీంతో సోమవారం అయిన జూన్ 15 నుంచే కొత్త విద్యా సంవత్సరాన్ని ప్రారంభించాలని నిర్ణయించింది.
పాఠశాలల పునఃప్రారంభానికి ముందుగానే అన్ని ఏర్పాట్లు పూర్తి చేయాలని విద్యాశాఖ జిల్లా అధికారులకు ఆదేశాలు జారీ చేసింది. విద్యార్థులకు పాఠ్యపుస్తకాలు, యూనిఫాంలు, మధ్యాహ్న భోజన పథకం, తాగునీటి సదుపాయాలు, పారిశుద్ధ్య ఏర్పాట్లు అందుబాటులో ఉండేలా చర్యలు తీసుకోవాలని సూచించింది.
అలాగే కొత్త విద్యా సంవత్సరంలో విద్యార్థుల హాజరు శాతాన్ని పెంచడం, డ్రాప్అవుట్లను తిరిగి పాఠశాలల్లో చేర్పించడం, విద్యా ప్రమాణాల మెరుగుదలపై ప్రత్యేక దృష్టి సారించాలని అధికారులను ఆదేశించింది. పాఠశాలల ప్రారంభం సందర్భంగా విద్యార్థులు, తల్లిదండ్రులు, ఉపాధ్యాయుల్లో ఉత్సాహం నెలకొంది.
జూన్ 15 నుంచి తెలంగాణ వ్యాప్తంగా పాఠశాలలు మళ్లీ విద్యార్థుల సందడితో కళకళలాడనున్నాయి. కొత్త విద్యా సంవత్సరం సాఫీగా, సమర్థవంతంగా ప్రారంభమయ్యేలా విద్యాశాఖ అన్ని చర్యలు చేపట్టినట్లు అధికారులు తెలిపారు.
