రైతన్నలకు అలర్ట్.. నెల రోజులే గడువు.. ఆ ఐడీ ఉంటేనే పథకాలు వర్తింపు!
ఆధార్ కార్డు మాదిరిగానే ప్రతి రైతుకు 11 అంకెలతో కూడిన ఒక విశిష్ట సంఖ్యను (Farmer Unique ID) కేటాయించేందుకు కేంద్ర ప్రభుత్వం చర్యలు వేగవంతం చేసింది.
ఇందుకోసం ‘ఫార్మర్ రిజిస్ట్రీ’ని అందుబాటులోకి తీసుకువచ్చింది. భూమి ఉన్న ప్రతి రైతు తన భూయాజమాన్య వివరాలను తన గుర్తింపు కార్డుతో అనుసంధానం చేయడం ద్వారా ఈ ఐడీని పొందవచ్చు. 2026-27 ఆర్థిక సంవత్సరం నుండి కేంద్ర ప్రభుత్వం అమలు చేసే కిసాన్ సమ్మాన్ నిధి, ఫసల్ బీమా యోజన, విత్తన, యంత్ర పరికరాల సబ్సిడీ వంటి అన్ని రకాల సంక్షేమ పథకాలు అందాలంటే ఈ యూనిక్ ఐడీ తప్పనిసరి.
ప్రస్తుతం తెలంగాణ రాష్ట్రవ్యాప్తంగా ఈ రిజిస్ట్రేషన్ ప్రక్రియ కొనసాగుతోంది. రాష్ట్రంలోని 32 జిల్లాల్లో ఉన్న మొత్తం 73.82 లక్షల మంది రైతుల్లో, ఇప్పటివరకు 48.97 లక్షల మంది (సుమారు 66.34 శాతం) రిజిస్ట్రేషన్ పూర్తి చేసుకున్నారు. ఈ ప్రక్రియలో 79.54 శాతంతో పెద్దపల్లి జిల్లా రాష్ట్రంలోనే ప్రథమ స్థానంలో నిలవగా, ఖమ్మం జిల్లా రెండో స్థానంలో ఉంది. అయితే, మేడ్చల్ (46.37 శాతం), రంగారెడ్డి (51.60 శాతం) జిల్లాలు ఈ జాబితాలో చివరి స్థానాల్లో నిలిచాయి. ఆదాయపు పన్ను చెల్లించే ఉద్యోగులు మరియు అవగాహన లేని కొందరు చిన్న రైతులు ఈ రిజిస్ట్రేషన్పై ఆసక్తి చూపకపోవడమే దీనికి ప్రధాన కారణంగా కనిపిస్తోంది.
భవిష్యత్తులో ఎరువుల కొనుగోలు, పంటల అమ్మకాలు మరియు ఇతర ప్రభుత్వ ప్రయోజనాల కోసం కూడా ఈ ఐడీని ప్రామాణికంగా తీసుకునే అవకాశం ఉందని అధికారులు స్పష్టం చేస్తున్నారు. ఈ రిజిస్ట్రేషన్ పూర్తి చేసుకోవడానికి కేవలం నెల రోజులే గడువు ఉన్నందున, రైతులందరూ మీ-సేవ కేంద్రాల ద్వారా లేదా సంబంధిత అధికారుల సహాయంతో త్వరగా రిజిస్ట్రేషన్ పూర్తి చేసుకోవాలని అధికారులు సూచిస్తున్నారు. లేనిపక్షంలో భవిష్యత్తులో కేంద్ర ప్రభుత్వ పథకాలకు దూరమయ్యే ప్రమాదం ఉందని హెచ్చరిస్తున్నారు.
