పెన్షన్లలో భారీ ప్రక్షాళన..!

కొత్త లబ్ధిదారులకు గుడ్‌న్యూస్ – అనర్హులకు చెక్..

గోల్డెన్ న్యూస్ /హైదరాబాద్ /తెలంగాణ ప్రభుత్వం కొత్త పెన్షన్ల మంజూరు, పంపిణీపై కీలక నిర్ణయం తీసుకుంది. బడ్జెట్‌లో ప్రకటించిన రెండు లక్షల కొత్త పెన్షన్ల అమలుకు ప్రభుత్వం సన్నాహాలు వేగవంతం చేసింది. భారీ సంఖ్యలో దరఖాస్తులు వచ్చే అవకాశం ఉండటంతో అర్హుల ఎంపిక, దరఖాస్తుల పరిశీలన, పంపిణీ విధానాలపై ప్రభుత్వం కసరత్తు చేస్తోంది.

కొత్త పెన్షన్లపై ప్రభుత్వం ఫోకస్.. వేలాది మందిలో ఆశలు

క్షేత్రస్థాయిలో ఇప్పటికే సర్వేలు కొనసాగుతుండగా, కొత్త పెన్షన్ల కోసం వేలాది మంది లబ్ధిదారులు ఎదురుచూస్తున్నారు. ఈ నేపథ్యంలో దరఖాస్తుల స్వీకరణ, అర్హుల ఎంపిక, పంపిణీ ప్రక్రియలకు సంబంధించి ప్రభుత్వం మార్గదర్శకాలను ఖరారు చేసినట్లు తెలుస్తోంది. పెన్షన్ల పంపిణీపై కూడా ప్రభుత్వం ఒక నిర్ణయానికి వచ్చినట్లు సమాచారం.

వచ్చే నెల నుంచి దరఖాస్తుల స్వీకరణ

కొత్త పెన్షన్ల కోసం ఎదురుచూస్తున్న వారికి తెలంగాణ ప్రభుత్వం కీలక అప్డేట్ ఇచ్చింది. పెన్షన్లకు అర్హులైన వారి నుంచి దరఖాస్తులను స్వీకరించనుంది. అనంతరం వాటిని పరిశీలించి అర్హులైన వారికి పింఛన్లు మంజూరు చేయనున్నారు. గ్రామాలు, పట్టణాల్లో సెర్ప్ అధికారులు ప్రస్తుతం క్షేత్రస్థాయిలో సర్వే నిర్వహిస్తున్నారు.

ఒంటరి మహిళలకు ముందుగా ప్రయోజనం 

వచ్చే నెల నుంచి ఒంటరి మహిళలకు పెన్షన్లు అందిస్తామని మంత్రి సీతక్క ఇప్పటికే ప్రకటించారు. అయితే అర్హత ఉన్నప్పటికీ తమకు పెన్షన్లు అందడం లేదని వృద్ధులు, దివ్యాంగులు, ఒంటరి మహిళలు ప్రభుత్వానికి ఫిర్యాదులు చేస్తున్నారు. ఈ నేపథ్యంలో నిజమైన లబ్ధిదారులను గుర్తించేందుకు ప్రభుత్వం ప్రత్యేక చర్యలు చేపట్టింది.

సర్వే తుది దశలో.. నెలాఖరుతో పూర్తి

అనర్హులను గుర్తించేందుకు ప్రభుత్వం రాష్ట్రవ్యాప్తంగా సర్వే చేపడుతోంది. ప్రస్తుతం ఈ సర్వే తుది దశకు చేరుకుంది. ఈ నెలాఖరుతో సర్వే పూర్తికానుండగా, వచ్చే నెల నుంచి కొత్త పెన్షన్ల కోసం దరఖాస్తుల స్వీకరణ ప్రారంభం కానుంది.

లైవ్ అథెంటికేషన్‌తో అనర్హుల గుర్తింపు

నిజమైన లబ్ధిదారులకు మాత్రమే పింఛన్లు అందించాలనే లక్ష్యంతో ప్రభుత్వం పేదరిక నిర్మూలన సంస్థ (SERP)ను రంగంలోకి దింపింది. ఈ సంస్థ లైవ్ అథెంటికేషన్ సర్వే నిర్వహిస్తూ క్షేత్రస్థాయిలో లబ్ధిదారుల వివరాలను పరిశీలిస్తోంది. అనర్హులను గుర్తించి జాబితా నుంచి తొలగించే ప్రక్రియ కొనసాగుతోంది.

రాష్ట్రంలో 42 లక్షల మంది పింఛన్ లబ్ధిదారులు 

ప్రస్తుతం తెలంగాణలో మొత్తం 42 లక్షల మంది పింఛన్లు పొందుతున్నారు. వీరిలో 19,04,239 మంది బ్యాంక్ ఖాతాల ద్వారా నేరుగా పింఛన్లు అందుకుంటున్నారు. ఇప్పటివరకు నిర్వహించిన సర్వేలో 93,624 మందిని అనర్హులుగా గుర్తించారు.

మరణించిన వారి పేర్లపై కూడా నిధుల ఉపసంహరణ 

సర్వేలో బయటపడిన వివరాలు ఆందోళన కలిగిస్తున్నాయి. 40,751 మంది మరణించినప్పటికీ వారి పేర్లపై ఇంకా పింఛన్ నిధులు విత్‌డ్రా అవుతున్నట్లు గుర్తించారు. మరో 41,689 మంది లబ్ధిదారుల ఆచూకీ లభించలేదు. 3,495 మంది ఇతర ప్రాంతాలకు వలస వెళ్లినట్లు అధికారులు నిర్ధారించారు.

ఆధార్ చెల్లకపోయినా ఖాతాల్లో డబ్బులు

సుమారు 11 వేల మంది లబ్ధిదారుల ఆధార్ వివరాలు చెల్లుబాటు కాకపోయినా వారి ఖాతాల్లో పింఛన్ నిధులు జమవుతున్నట్లు సర్వేలో తేలింది. దీంతో ప్రభుత్వం మరింత కఠినంగా ధృవీకరణ ప్రక్రియ చేపడుతోంది.

15.97 లక్షల మందికి సర్వే పూర్తి

ఇప్పటివరకు 15.97 లక్షల మంది లబ్ధిదారుల సర్వే పూర్తయింది. మిగిలిన వారి వివరాలను కూడా త్వరలో పూర్తి చేసి తుది జాబితా సిద్ధం చేయనున్నారు.

ఇకపై బ్యాంక్ ఖాతాల్లోకే నేరుగా పింఛన్లు

పారదర్శకత పెంచడం, అవకతవకలకు అడ్డుకట్ట వేయడం కోసం ఇకపై పింఛన్లను నేరుగా లబ్ధిదారుల బ్యాంక్ ఖాతాల్లో జమ చేయాలని ప్రభుత్వం నిర్ణయించింది. దీంతో మధ్యవర్తుల ప్రమేయం లేకుండా నిధులు నేరుగా అర్హులకే చేరనున్నాయి.

జూలై నుంచి కొత్త పెన్షన్ల పంపిణీకి రంగం సిద్ధం

సర్వే పూర్తయ్యాక కొత్త దరఖాస్తులను పరిశీలించి అర్హుల జాబితా ఖరారు చేయనున్నారు. అనంతరం జూలై నెల నుంచే కొత్త పెన్షన్ల పంపిణీ ప్రారంభించే అవకాశం ఉన్నట్లు అధికార వర్గాలు చెబుతున్నాయి. దీంతో కొత్త పెన్షన్ల కోసం ఎదురుచూస్తున్న వేలాది మంది లబ్ధిదారుల్లో ఆశలు చిగురిస్తున్నాయి.