లంచం కేసులో తహసీల్దార్‌కు రెండేళ్ల జైలు శిక్ష

కరీంనగర్: అవినీతి నిరోధక చట్టం కింద నమోదైన కేసులో మంచిర్యాల జిల్లా కాసిపేట మండల తహసీల్దార్‌గా పనిచేసిన అలుగునూరి రోషయ్య దోషిగా తేలారు. ఈ కేసులో ఆయనకు రెండేళ్ల కఠిన కారాగార శిక్షతో పాటు రూ.5,000 జరిమానా విధిస్తూ కరీంనగర్‌లోని ఎస్‌పీఈ, ఏసీబీ కేసుల ప్రత్యేక న్యాయస్థానం న్యాయమూర్తి నామ సంతోష్ కుమార్ సెప్టెంబర్ 10, 2026న తీర్పు వెలువరించారు.

క్రైమ్ నంబర్ 02/ACB-KNR/2013, సీసీ నంబర్ 19/2016 కేసులో తహసీల్దార్ అలుగునూరి రోషయ్యపై అవినీతి నిరోధక చట్టం, 1988లోని సెక్షన్ 7, సెక్షన్ 13(1)(d)తో కలిపి 13(2) కింద అభియోగాలు నమోదయ్యాయి. విచారణ అనంతరం న్యాయస్థానం ఆయనను దోషిగా నిర్ధారించింది.

సెక్షన్ 7 కింద రెండేళ్ల కఠిన కారాగార శిక్షతో పాటు రూ.5,000 జరిమానా విధించారు. జరిమానా చెల్లించకపోతే అదనంగా మూడు నెలల సాధారణ జైలు శిక్ష అనుభవించాల్సి ఉంటుంది.

అదేవిధంగా సెక్షన్ 13(1)(d)తో కలిపి 13(2) కింద మరో రెండేళ్ల కఠిన కారాగార శిక్ష, రూ.5,000 జరిమానా విధించారు. ఈ జరిమానా చెల్లించడంలో విఫలమైతే మరో మూడు నెలల సాధారణ కారాగార శిక్ష ఉంటుందని కోర్టు పేర్కొంది. అనుభవించాల్సి

రూ.10 వేల లంచం డిమాండ్ చేసి స్వీకరణ

ఈ కేసుకు సంబంధించిన వివరాల ప్రకారం, 2013 జనవరి 9న కాసిపేట మండల తహసీల్దార్గా పనిచేస్తున్న అలుగునూరి రోషయ్య ఫిర్యాదుదారుడి నుంచి రూ.10,000 లంచం డిమాండ్ చేసి స్వీకరించారు.

ఫిర్యాదుదారుడి వ్యవసాయ భూమిని రెవెన్యూ రికార్డుల్లో (జమాబందీ) అతని పేరుపై మ్యుటేషన్ చేయడంతో పాటు పట్టాదార్ పాస్బుక్ జారీ చేసేందుకు అధికారిక అనుకూల చర్యలు తీసుకోవడం కోసం ఈ లంచం డిమాండ్ చేసినట్లు ఏసీబీ కేసు వివరాల్లో పేర్కొంది. ఈ కేసులో విచారణ పూర్తయిన అనంతరం కోర్టు నిందిత అధికారి రోషయ్యను దోషిగా నిర్ధారించి శిక్ష విధించింది.